د څارنوال عبدالستار خواصي انسټیټوټ د محصلینو فراغت مراسم ترسره شول
د څارنوال عبدالستار خواصي کثيرالرشتوي انسټیټوټ د فارغانو فراغت مراسم د سيمه ييزو چارواکو، علماوو، مخورو او ځوانانو په حضور کې ترسره شول.
دغه فارغان چې شمېر يې نږدې ۴۰ تنه دى، د دغه ښوونيز مرکز له ساختمان او ادارې او مدیریت څانګو څخه فارغ شول.
د پروان ولایت د تخنیکي آمر ښاغلي مولوي محمدزي رسولي د فراغت په مراسمو کې د وینا پر مهال محصلینو ته د فراغت مبارکي وویله او ټینګار یې وکړ چې ځوانان باید د علم ترلاسه لپاره لا زیات کار وکړي.
نورو ويناوالو هم د هېواد په اقتصادي وده کې د تخنيکي او مسلکي زده کړو په ارزښت خبرې وکړې او ټينګار يې وکړ چې د نننۍ ټولنې پرمختګ د تخنيکي او مسلکي زده کړو محصول دى.
دغه مراسم فارغانو ته د تصدیق پاڼو په ورکولو او د افغانستان لپاره د خیر دعا په ویلو سره پای ته ورسیدل.
