د تخار تخنیکي او مسلکي زده کړو آمریت له لنډ مهاله مسلکي کورسونو څه باندې ۷۰ تنه فارغ شول
د تخار ولایت تخنيکي او مسلکي انسټیټوټ د موبايل ترميم او خياطۍ په څانګو کې د روزنيز کورس له لومړي پړاو څخه شاوخوا ٧٠ تنه فارغ شول.
د دغه زده کړیالانو د فراغت مراسم د تخار ولایت د علماوو او سیمه ییزو چارواکو په حضور کې ترسره شول.
په دغه مراسمو کې د تخار ولایت د تخنیکي او مسلکي زده کړو آمر انجینر محمد ایفل مبارز فارغانو ته د مبارکۍ ترڅنګ د ټولنې د اقتصادي ودې او د هغې د اغیزمنتیا په برخه کې د ځوانانو د رول او د مسلک په هکله خبرې وکړې.
نوموړي ځوانان د ټولنې د ملا تیر او د اقتصادي بدلون عامل وبلل او د حرفوي کورسونو له فارغانو یې وغوښتل، چې خپله پوهه او مهارتونه د ټولنې د خدمت لپاره وکاروي.
د یادونې وړ ده، چې د دری میاشتني حرفوي کورسونو له لومړۍ دورې څخه ۶۸ تنه ځوانان فارغ شول. له دې جملې څخه ۴۶ تنه د موبايل د ترميم او ۲۲ تنه د خیاطۍ په برخو کې روزل شوي دي.
