سویډن کمیټې د تخنیکي او مسلکي زده کړو ادارې له مشرتابه سره وکتل
د سویډن کمیټې یوه پلاوي د تخنیکي او مسلکي زده کړو ادارې له سرپرست ښاغلی مولوي غلام حیدر شهامت سره وکتل.
په دې غونډه کې چې د تخنیکي او مسلکي زده کړو ادارې د پلان او ستراتیژیکو همغږۍ د رئیس ښاغلي نیک محمد نیکمل په مشرۍ جوړه شوې وه، د دغه ادارې مرستیالانو هم حضور درلود.
لومړی د سویډن کمیټې د ټول ګډونه زده کړو مسؤول شاه خسرو د دغې کمیټې د فعالیتونو په اړه خبرې وکړې او ویې ویل چې دوی د پوهنې، روغتیا، بیارغونې او د معلولینو د ملاتړ په برخو کې کار کوي.
هغه زیاته کړه، د سویډن کمیټې فعالیتونه په ۱۳ ولایتونو او ۶۰ ولسوالیو کې متمرکز دي.
ښاغلي شاه خسرو څرګنده کړه چې د سویډن کمیټه معلولینو ته حرفوي زده کړې او ځانګړې زده کړې ورکوي او له فراغت وروسته هغوی ته بلاعوضه قرضونه ورکوي.
د تخنيکي او مسلکي زده کړو ادارې سرپرست ښاغلی مولوي غلام حيدر شهامت د سويډن کمېټې له مرستو مننه وکړه او د دغو مرستو د دوام غوښتنه يې وکړه.
ښاغلي شهامت وویل چې د لا زیاتو مرستو او همغږۍ لپاره هوکړه لیک ته اړتیا ده.
د دغه ادارې تخنيکي سلاکار ښاغلی روح الله هوتک د سويډن کمېټې پخوانۍ همکارۍ ته په اشارې سره وويل، دغې کمېټې د بریل چاپ د مطبوعو لپاره ماشينونه او تجهيزات پېرودلي او دغه مطبعه لا هم تجهيزاتو ته اړتيا لري.
د تخنيکي او مسلکي زده کړو ادارې د حرفوی برنامو د سمون رئيس ښاغلی عبدالودود هوتک هم په دې غونډه کې وويل، چې د دغه ادارې او سويډن کمېټې فعاليتونه ډېر مشترک دي او اړتيا ده، چې د دواړو خواوو فعاليتونه همغږي شي.
