د میدان وردګو د تنګي نور درې کثیرالرشتوي انسټیټوټ محصلینو د سید آباد سب اسټیشن څخه لیدنه وکړه
علمي سفرونه د نظري زده کړو او د کاري او صنعتي چاپیریال واقعیتونو ترمنځ د نښلولو لپاره له خورا اغیزمنو لارو څخه ګنل کېږي. په ښوونیزو چاپیریالونو، په ځانګړي توګه د تخنیکي او مسلکي زده کړو مرکزونو کې، عملي زده کړې د محصلینو د مهارتونو په لوړولو او د کار بازار لپاره د هغوی په چمتو کولو کې کلیدي رول لوبوي.
په همدې اساس، د میدان وردګو ولایت د تنګي نور درې کثیرالرشتوي انسټیټوټ د برق څانګې محصلینو د یاد ولایت سید آباد ولسوالۍ د برق سب اسټیشن ته د یو علمی سفر په ترڅ کې د سب اسټیشن تجهیزاتو په اړه روزنه ترلاسه کړه.
لارښود استاد د دې علمي سفر په جریان کې، محصلینو ته د سب اسټیشن تجهیزاتو او کنټرول خونې په اړه مفصل توضیحات وړاندې کړل او د نوموړو پوښتنو ته یې هم ځوابونه ورکړل.
د عملي روزنو زده کړه محصلینو سره مرسته کوي چې هغوی مطالب په ژوره توګه او علمي مفاهیم په ډیر کاربردي او عملي ډول درک کړي.
له همدې امله، د تخنیکي او مسلکي زده کړو ادارې رهبري تل هڅه کوي چې د تخنیکي او مسلکي زده کړو په مرکزونو کې د عملي زده کړو لړۍ پیاوړې کړي.
