د برښنا په اړه د لغمان ولایت د مرکز اړوند کثیرالرشتوي انسټيټوټ د محصلینو د عملی زده کړو بهیر
د لغمان ولایت د مرکز اړوند کثیرالرشتوي انسټيټوټ د برښنا څانګې محصلینو ته د برښنا په اړه په عملي بڼه روزنه ورکړل شوه.
لارښود استاد د درس په ترڅ کې محصلینو ته د بریښنا او سویچ (برقی مبدل) په اړه مفصل توضیحات ورکړل او د نوموړو پوښتنو ته یې ځوابونه هم وویل.
د تخنيکي او مسلکي زده کړو په مرکزونو کې ډیری زده کړې عملي دي، څرنګه چې د تخنيکي او مسلکي زده کړو د مرکزونو فارغان له فراغت وروسته په مستقيم ډول د کار بازار ته جزبېږي.
دا په داسې حال کې ده چې په نړۍ کې د ټکنالوژۍ په پرمختګ سره د برېښنا ارزښت ورځ تر بلې په ډېرېدو دی او اوس مهال ټول پرمختللي هېوادونه خپل ډېری چارې له برېښنا د کار اخیستلو په واسطه ترسره کوي.
له همدې امله د تخنيکي او مسلکي زده کړو ادارې رهبري تل هڅه کوي چې د تخنيکي او مسلکي زده کړو په مرکزونو کې د عملي زده کړو بهير لا پياوړی کړي.
