د تخنیکي او مسلکي زده کړو د استادانو د ظرفیتونو د ارزونې او لوړولو طرحه وړاندې شوه
د تخنیکي او مسلکي زده کړو ادارې د رهبري پلاوي غونډه ددې ادارې د ښوونیزو مرکزونو د داخل خدمت استادانو د ارزونې د طرحې وړاندې کولو په موخه جوړه شوه.
د دې غونډې په پیل کې محترم روح الله هوتک د رهبرۍ په غونډه کې الحاج مولوي غلام حیدر شهامت او حاضرو غړو ته د استادانو د ارزونې طرحه تشریح کړه.
ښاغلي هوتک وویل، د استادانو د ارزونې له طرحې څخه یې موخه دا ده، چې د تخنیکي زده کړو په مرکزونو کې نوموړي استادان د خپلو تحصیلي څانګو پر بنسټ تدریس وکړي.
له بلې خوا هغه وويل چې د دغې طرحې په پلي کېدو سره به د استادانو د ظرفيتونو د لوړولو زمينه هم برابره شي.
په نننۍ غونډه کې ګډونوالو د ښوونکو د ارزونې د طرحې د تطبیق د څرنګوالي په اړه د تخنیکي او مسلکي زده کړو ادارې له مشرتابه سره خپل نظرونه شریک کړل او لازم تصمیمونه ونیول شول.
