د سرپل ولایت د زده کړو مرکزونو له مسؤلینو سره د تخنیکي او مسلکي چارو د معاون خبرې اترې
ښاغلی مولوي غلام سعید احساس، د تخنیکي او مسلکي چارو مرستیال، سرپل ولایت ته د خپل سفر په پای کې، د دغه ولایت د تخنیکي او مسلکي زده کړو مرکزونو له مسؤلینو سره لیدنه او خبرې اترې وکړې.
نوموړي په دغه ناسته کې له کارکوونکو څخه وغوښتل چې هېواد او خلکو ته د خدمت کولو لپاره باید په خپل ټول توان سره هلې ځلې وکړي.
له بل لوري ښاغلي مولوي احساس ټینګار وکړ چې دندې باید د عبادت په نیت ترسره شي او کارکوونکي باید مسؤلیت قبول کړي.
د تخنیکي او مسلکي چارو مرستیال، په هېواد کې کرنې ته په اشارې سره وویل، باید کوښښ وشي چې له عصري او مدرن کرنې څخه ډېره ګټه واخیستل شي.
نوموړي د تخنیکي او مسلکي زده کړو په مرکزونو کې دعملي زده کړو په پراختیا ټینګار وکړ.
نوموړي په دغه ولایت کې د مجاهدینو د جذب او روزنې په هکله هم خبرې وکړې، او زیاته یې کړه « مجاهدینو ته باید د تخنیکي او مسلکي زده کړو ادارې له لوري د جوړې شوې طرحې پر بنسټ روزنه ورکړل شي».
د تخنیکي او مسلکي چارو مرستیال د مجاهدینو له لوري په حاضرۍ او درسونو کې د برخې اخیستلو په هکله هم ټینګار وکړ.
ددغه ناستې په پای کې د چارو د ښه ترسره کولو په موخه د سرپل ولایت د تخنیکي او مسلکي زده کړو کارکونکو ته پریزنتیشن وړاندې شو.
