د تخنیکي او مسلکي زده کړو په اداره کې بدلونونه؛ شپږ نوي رئیسان معرفي شول
د تخنيکي او مسلکي زده کړو ادارې په وړانديز او د افغانستان اسلامي امارت د ریاست الوزرا په منظورۍ په ياده اداره کې نوي بدلونونه او ګمارنې رامنځته شوې.
په نویو ګمارنو کې انجینر احمد نبي نائل د مقام پخوانی تخنیکي سلاکار د نصاب او ښوونکو د روزنې رئیس په صفت، مفتي سید محسن سادات د خدماتو او املاکو پخوانی رئیس د برنامو د څیړنې او د تضمین کیفیت رئیس په صفت، مولوي عبدالودود هوتک د حرفوي برنامو د سمون پخوانی رئیس د تعلیمي او تحصیلي څارنې او اروزنې رئیس په صفت، عصمت الله منیر د نصاب او ښوونکو د روزنې پخوانی رئیس د حرفوي برنامو د سمون رئیس په صفت، قاضي محمد شاه میر غوري د مقام پخوانی حقوقي سلاکار د خدماتو او املاکو رئیس په صفت، مولانا خالد یعقوبي د بشري سرچینو پخوانی رئیس د مقام حقوقي مشاوریت د سرپرست په صفت او انجینر محمد مکاشف د تعلیمي او تحصیلی څارنې او ارزونې پخوانی رئیس د بشري سرچینو ریاست د سرپرست په صفت ګمارل شوي دي.
نوموړي اشخاص نن د تخنيکي او مسلکي زده کړو ادارې سرپرست مولوي غلام حيدر شهامت له خوا خپلو نویو بستونو ته ور وپېژندل شول.
د تخنيکي او مسلکي زده کړو ادارې سرپرست په دغې ادارې کې د نویو بدلونونو په اړه وويل، چې په دې امر کې شخصي غرض نشته، بلکې ټول اقدامات د چارو د لا ښه والي په موخه ترسره شوي دي.
ښاغلي شهامت وویل، چې د ټولو موخه یوه ده، چې هغه د خلکو خدمت دی.
نوموړي د تخنيکي او مسلکي زده کړو ادارې د منصوبینو ترمنځ پر همکارۍ او مشورې ټينګار وکړ او ويې ويل، «ټول بايد د دغې ادارې د پرمختګ او خلکو د خدمت لپاره د جهاد په نيت کار وکړو».
د تخنيکي او مسلکي چارو مرستيال مولوي غلام سعيد احساس هم په خپلو خبرو کې وويل، چې دولتي مقام يو امانت دى او دا امانت بايد په ښه توګه وساتل شي.
ښاغلي احساس د تخنیکي او مسلکي زده کړو ادارې له نویو رئیسانو وغوښتل چې د چارو د ښه والي لپاره هڅې وکړي.
