د تخنیکي او مسلکي زده کړو ادارې د ۴۰۰ زره ټوکه درسي کتابونو د وېش لړۍ پیل شوه
د تخنیکي او مسلکي زده کړو ادارې د ۴۰۰ زره جلده درسي کتابونو د ویش د لړۍ پرانیسته د ا.ا.ا د عالي رتبه مسؤلينو په حضور کې ترسره شوه.
د مراسمو په پيل کې د تخنيکي او مسلکي زده کړو ادارې د معلوماتو او عامه اړيکو آمر استاد مطيع الله هدايت د چاپ شويو کتابونو په اړه معلومات ورکړل او ويې ويل، چې د لومړي ځل لپاره دغه اندازه کتابونه د ا.ا.ا په لوګو او پيغام سره چاپ شوي دي.
ښاغلي هدایت وويل: دغه کتابونه د (برق، ساختمان، وترنري، د موټر ترميم، کمپيوټرساينس، ادارې او حسابداری، جيودوزي، ماشين، او د ښوونکو د لارښوود کتابونه دي) چې په لنډ وخت کې به د ټولو متعلمينو او محصلينو تر لاسونو پورې ورسېږي.
ورپسې د تخنيکي او مسلکي زده کړو ادارې رئيس مولوي غلام حيدر شهامت خبرې وکړې او ويې ويل: ياده اداره د هېواد د نورو تعليمي ادارو ترڅنګ د هېواد د بچيانو د روزنې مسووليت په غاړه لري.
ښاغلي شهامت زیاته کړه، د تخنیکي او مسلکي زده کړو مرکزونه په عملي زده کړو تمرکز کوي او دا د تخنیکي او مسلکي زده کړو د مرکزونو او نورو ښوونیزو بنسټونو ترمنځ یو لوی توپیر دی.
د تخنيکي او مسلکي زده کړو ادارې سرپرست ټينګار وکړ، چې د بشري منابعو روزنه، د کار پيدا کول او د بېوزلۍ له منځه وړل د دې ادارې اساسي موخې دي.
ښاغلي شهامت په خپلو خبرو کې زیاته کړه، د کتابونو نشتوالی د تخنیکي او مسلکي زده کړو د مرکزونو یوه له عمده ستونزو څخه دی، چې اوس د چاپ شویو کتابونو په وېش سره تر يوې اندازې حل کېږي، ښاغلي شهامت وويل: په تېرو دوو لسيزو کې په دومره اندازه کتابونه نه دي چاپ شوي.
ښاغلي شهامت د تخنيکي او مسلکي زده کړو ادارې د راتلونکو پلانونو په اړه هم خبرې وکړې او ويې ويل: په پام کې ده په نږدې راتلونکي کې په ټولو صنعتي پارکونو کې انستيتوتونه جوړ شي، دارنګه کاربردي پوهنتون، د هر زون په کچه د تخنیکي او مسلکي زده کړو لپاره کمپلکسونه جوړول يې له لومړيتوبونو څخه دي.
ورپسې د مهاجرينو چارو وزير الحاج خلیل الرحمن حقاني وینا وکړه او په هېواد کې یې د تعلیمي ادارو ترمنځ پر همغږۍ ټینګار وکړ.
ښاغلي حقاني وویل: په تعلیمي کتابونو کې باید د هېواد اسلامي ارزښتونو او کلتور ته ډېره پاملرنه وشي.
په دې کتنه کې داقتصاد وزارت مسلکي معين عبداللطيف نظري د نصاب په متونو ټينګار وکړ او ويې ويل چې نور بايد زموږ هېواد په علمي او پوهنيز ډګر کې خپلواکي ترلاسه کړي .
ښاغلي نظري وویل: افغانستان یو خپلواک هېواد دی، له علمي پلوه هم بايد خپلواک او د ځوانانو په روزنه کې ډير کار وشي.
د اقتصاد وزارت مرستیال د تخنیکي او مسلکي زده کړو ادارې لخوا د ۴۰۰ زره جلده کتابونو چاپ یو ستر کار وباله او د دې ادارې د رهبرۍ ستاینه یې وکړه.
د حکومت د اطلاعاتو او رسنیو مرکز مشر مفتي انعام الله سمنګاني په خپلو خبرو کې د کتابونو پر ارزښت خبرې وکړې او ویې ویل چې افغانستان نن کتابونو ته اړتیا لري.
ښاغلي سمنګاني زیاته کړه کتاب مو منزل ته رسوي، او ويې ويل: په افغانستان کې امنیت تامین شوی او اوس اړتیا ده چې تخنيکي او مسلکي زده کړو ته پاملرنه وشي. سمنګاني وويل: د تخنيکي او مسلکي زده کړو اداره د پوهنې او لوړو زده کړو موسسو ترڅنګ د هېواد په پرمختګ کې مهم رول لوبولى شي.
د غونډې په وروستی برخه کې د تخنيکي او مسلکي زده کړو ادارې د نصاب رئيس، د چاپ او نشر عمومي مدير او د چاپ مسؤل په تقدير نامو سره وستايل شول، او د افتتاح مراسم په دعايه سره پای ته ورسیدل.
