د کابل ښار د انسټیټونو ارزونې پایلې وړاندې شوې
د کابل ښار د انسټیټونو د ارزونې پایلې چې د دې ادارې د تخنیکي او مسلکي زده کړو ادارې د زده کوونکو او زده کړیالانو د چارو د رئیس سید عباس ایوبي په مشرۍ د یوه ټیم له خوا ترسره شوې وې، د ادارې رهبری ته وړاندې شوې.
د ارزونې په غونډه کې، چې په کابل کې د انسټیټونو امرین هم په کې برخه لرله، ښاغلي ایوبي وویل، چې له ارزونې څخه یې موخه د انسټیټونو د وضعیت څېړنه وه.
د تخنيکي او مسلکي زده کړو ادارې مشر مفتي فضل الرحمن فاضل د ارزونې له ټيم څخه مننه وکړه او د څېړنې پايلې يې اغېزمنې وبللې.
ښاغلي فاضل د ښوونیز مرکز د کارکوونکو او ښوونکو له لوري د مسؤلیت پر پوهاوي ټینګار وکړ او خوښي یې وښوده چې د تخنیکي او مسلکي زده کړو ادارې ټول غړي په خپل مسوولیت خبر دي.
د تخنيکي او مسلکي زده کړو د ادارې د اکاډمیکو چارو مرستيال نورمحمد عزيزي هم وويل: هر څوک چې خپل مسووليت درک کړي، په دې پوهيږي چې خلکو او خداى ته حساب ورکوونکى دى.
ښاغلي عزیزي د کابل د انسټیټونو ارزونې ته په اشارې سره د دې ارزونې پایله مثبته وبلله او د ارزونې ټیم یې ستاینه وکړه.
